മകരജ്യോതി എന്താണ്?

ശബരിമലയിലെ പ്രധാന ഉത്സവമാണ് മകരവിളക്ക് ഉത്സവം. മകരം ഒന്നാം തീയ്യതിയാണ് മകരവിളക്ക് ഉത്സവം നടക്കുന്നത്. ധർമ്മശാസ്ത ക്ഷേത്രത്തിൽ ദീപാരാധനയ്ക്ക് ശേഷം കിഴക്ക് പൊന്നമ്പലമേട്ടിൽ പ്രതീകാത്മകമായ ദീപാരാധന നടത്തും. മൂന്നുപ്രാവശ്യമാണ് മകരജ്യോതി തെളിയുക. ലക്ഷകണക്കിന് അയ്യപ്പഭക്തരാണ് മകരജ്യോതി ദർശനത്തിനായി വർഷം തോറും എത്തുന്നത്.

മകരജ്യോതിക്കു ശേഷം രാത്രിയിൽ മാളികപ്പുറത്തമ്മയെ ആനപ്പുറത്ത് വാദ്യമേളങ്ങളുടെ അകമ്പടിയോടെ പതിനെട്ടാം പടിയിലേക്ക് ആനയിക്കുന്നു. ശരംകുത്തിയാലിൽ ശരങ്ങൾ കാണുമ്പോൾ മാളികപ്പുറത്തിനെ തിരിച്ചെഴുന്നള്ളിക്കുന്നു. തിരിച്ചെഴുന്നളിക്കുന്നതോടെ മകരവിളക്ക് ഉത്സവത്തിന് തുടക്കമാവുന്നു. പന്തളം മുൻ രാജകുടുംബത്തിൽ നിന്നെത്തുന്ന തിരുവാഭാരണങ്ങൾ മകരവിളക്ക് ദിവസമാണ് അയ്യപ്പനെ അണിയിക്കുന്നത്.

സുര്യൻ ധനുരാശിയിൽ നിന്ന് മകരം രാശിയിലേക്ക് മാറുന്ന മുഹൂർത്തത്തിൽ മകരസംക്രമ പൂജകൾ ക്ഷേത്രത്തിൽ നടത്തുന്നു. വിശേഷ പൂജകൾക്കൊപ്പം അയ്യപ്പന് സംക്രമാഭിഷേകവും നടത്തുന്നു. ഏഴാം ദിവസം മാളികപ്പുറത്തിന് ഗുരുതി സമർപ്പണവും, പിറ്റേന്ന് മുൻ പന്തളം രാജപ്രതിനിധിയുടെ തനിച്ചുള്ള ക്ഷേത്ര ദർശനവും കഴിയുന്നതോടെ മകരവിളക്ക് ഉത്സവം സമാപിക്കും